Rev 3 | MED | STEP | Wote, Sartis kona ila Got nga rapa tenda wamp kᵾⱡ nga anggelo morum ei kᵾn, mon ei mel rokᵾn ngui! Got nga Muⱡnga 7 kᵾⱡ kᵾn, mipil 7 kᵾⱡ kᵾn, ambuⱡpa morum wu ei ndi, nombuⱡa rung ik ei mel, nimba mundnᵾm. Nim kongun etᵾn uⱡ mbᵾ, nanim pilip mor ei, nim pilkᵾn ninim kont mor ku nᵾtᵾn. Ei mon, nim wamp kui on ei morᵾn.

Revelation of John 3

Sartis Kona Ila, Got Nga Rapa Tenda Wamp Kᵾⱡ Kᵾn, Mon Rokᵾn Ngui

1 Wote, Sartis kona ila Got nga rapa tenda wamp kᵾⱡ nga anggelo morum ei kᵾn, mon ei mel rokᵾn ngui! Got nga Muⱡnga 7 kᵾⱡ kᵾn, mipil 7 kᵾⱡ kᵾn, ambuⱡpa morum wu ei ndi, nombuⱡa rung ik ei mel, nimba mundnᵾm. Nim kongun etᵾn uⱡ mbᵾ, nanim pilip mor ei, nim pilkᵾn ninim kont mor ku nᵾtᵾn. Ei mon, nim wamp kui on ei morᵾn. 2 Ei kᵾn, nim rut nᵾkᵾn oⱡa muⱡi! Wote, nim nga uⱡ kai mbᵾ koⱡmba enim ei, etkᵾn ronduⱡ mundi! Ei nambuⱡ emel, na nga Got nga kuimp keta ila, nim nga etᵾn uⱡ mbᵾ, kun pi naprᵾm. 3 Nim unt rᵾnang ik mbo endᵾtᵾng pitin nimbᵾ, tᵾk mendkᵾn molkᵾn, ik ei pep rokᵾn, uⱡ kit etᵾn mbila, numan ropᵾl rui! Nim rut nᵾkᵾn oⱡa muⱡi nᵾmin ndam, na kᵾndᵾp wamp na ormᵾn ni mel, ant mong nant kᵾn uimp ei, tᵾp tᵾndᵾp nim kᵾn uimp. 4 Wote, int Sartis kona ila, wamp onunga kat tekᵾn morᵾn kᵾⱡ ndi, en enim nga wal pᵾki mbᵾ, etᵾk ⱡar mundi namᵾndᵾrmᵾn. Wamp kᵾⱡ wal pᵾki kurᵾmᵾⱡa mbᵾ pᵾkangina, na kᵾn rᵾp rop mbin. Ei nambuⱡ emel, wamp kᵾⱡ, na pᵾt uⱡ mbᵾ mel, etᵾk mormin. 5 El etpa int pendᵾm wamp ei, muⱡ mbal kurumuⱡa mbᵾ pakᵾndᵾp, wote elim nga mbi ei, uⱡ nga kᵾnt nga kont muⱡ buk ila morum ei, rop puⱡa rui nᵾrimp. Wamp ei nga mbi ei, na nga Wuta mondᵾp kᵾn, elim nga anggelo mbᵾ nga mormin, kuimp keta ila para ndup mbi timp. 6 Wamp nam ti, kum nombuⱡa tem ti ndi, Muⱡnga ei ndi, Got nga rapa tenda wamp mbᵾ, kundpa ninim ik ei pilangga!

Pilandelpiya Kona Ila, Got Nga Rapa Tenda Wamp Kᵾⱡ Kᵾn, Mon Ei Rokᵾn Ngui

7 Wote, Pilandelpiya kona ila Got nga rapa tenda wamp kᵾⱡ nga anggelo morum ei kᵾn, mon ei mel rokᵾn ngui! Ya nombuⱡa rung ik mong kᵾⱡ, wu wingti, wu kupa, wote Depit nga kumba ki tepa morum ei ndi, nimba mundnᵾm. Wu ei ndi, kumba ki tᵾpa tetᵾm ei, wamp ti ndi, kapⱡa kumba rui narᵾmba. Wote, wu ei ndi, kumba ropa gi ndurum ei kᵾn, wamp ti ndi, kapⱡa kumba ti natᵾmba. 8 Nim nga etᵾn uⱡ mbᵾ, na pilip mor. Wote, nim nga ronduⱡ ti, ou ndupa mon ei, na pᵾnt ku. Wote, na nga ik mong kᵾⱡ ambulkᵾn gi ndukᵾn, na nga mbi ei, tᵾkᵾn mbuⱡ ngui nganggᵾrᵾn ei, na pᵾt. Ei nga, nim nga kuimp keta ila kumba tᵾp tint ei, wamp ti ndi, kapⱡa kumba rui narᵾmba mon! 9 Pᵾnminan! Seitan nga wamp rᵾⱡaip mormin mbᵾ ndi, ik kol rok, en enim Jura wamp ku nᵾk etmin wamp mbᵾ, na ndi, etᵾp elik rᵾndamba. Nim nga kᵾmp puⱡ ila ok, rumᵾⱡi ping. I tamba pilik kᵾn, na ndi, nim numan ngor uⱡ ei, pilik mbi nduing. 10 Ei kᵾn, nim na nga nᵾmp ngur ik nimbᵾ, pilik tᵾkᵾn mbun orum ei kᵾn, ronduⱡ pukᵾn morᵾn. Wote, ui tila muⱡ uⱡ mbila, wamp mbᵾ nga oⱡa tᵾpa kᵾni uⱡ mat omba, enim ila nim etᵾp peng kont timp.

11 Na nondpa uimp ent! Nim nga mondpa pili tᵾkᵾn morᵾn ei, ambulk gi ndukᵾn muⱡi! I etkᵾn mᵾn ei kᵾn, nim nga ronduⱡ pukᵾn, kongun etkᵾn mel kai ti, wote tin ei, wamp ti ndi, roldpa ti natᵾmba mon! 12 El etpa int pendᵾm ei kᵾn, na ndi, wamp ei etᵾp, na nga Got nga manga wingti ou ei nga paka rumᵾnt mel mundamba omba, ekit pi napᵾmba. Wote, wamp ei nga kᵾng ila, na nga Got ei nga mbi ei, rop mundimp. Wote, na nga Got ei nga kona peng kont Jerusalem, wi muⱡ ila tepa mana omba, kona ei nga mbi kont ei kᵾn kunda, wote wamp ei nga kᵾng ila, na nga mbi kont mon rop mundimp. 13 Wamp nam ti, kum nombuⱡa tem wamp ti ndi, Muⱡnga ei ndi, Got nga rapa tenda wamp kᵾⱡ, kundpa ninim ik ei pilangga!

Leyoresiya Kona Ila, Got Nga Rapa Tenda Wamp Kᵾⱡ Kᵾn, Mon Ei, Rokᵾn Ngui

14 Wote, Leyoresiya kona ila wamp kᵾⱡ nga anggelo morum ei kᵾn, mon ei mel rokᵾn ngui. ‘Ei kupa,’ nga Puⱡ Wu moⱡpa, rᵾk rᵾk uⱡ kupa mbᵾ etpa, ik kupa mint nimba. Wote, Got nga itim mel mbᵾ pora, rᵾp etᵾm wu ei ndi, nombuⱡa rung ik kᵾⱡ nimba mundnᵾm. 15 Nim nga etᵾn uⱡ mbᵾ, na pilip mor. Ei, nim pou ni nanᵾn, wote nim muⱡ iti natᵾn. Wote, na ndi pᵾnt ei, nim pou nin ndam, pou mint ni, wote muⱡ itᵾn ndam, muⱡ mint iti! 16 Wote, nim pou ni nanᵾn, wote muⱡ iti natᵾn kona ten pᵾnt ei kᵾn, nim kopop pupᵾl rop mundᵾp kilimp. 17 Ei nambuⱡ emel, nim ndi, nᵾkᵾn mel, na nanim kng orunga mel pelinga mor ku nᵾkᵾn, mel mbᵾ nga, na kuri nakᵾrᵾr nᵾtᵾn. Ei wote, nim pek morᵾn uⱡ ei, kit moⱡnga. Wamp mbᵾ ndi, nim kandᵾk kont kurmin. Ei, nim kurpa mendpᵾⱡ morᵾn, wote mong raⱡ kit morum ku. Wote wal pᵾki na mel ti, mon nduⱡnga, gi gou andrᵾn ei, ninim pilkᵾn kun iti natkᵾn nᵾtᵾn. 18 Ei kᵾn, akup nim man ngump ik ei nᵾnt. Nim na kᵾn okᵾn, gol ti, ndip ndi numba eng nom ei, rarᵾp rokᵾn tana, nim mel piyangga! Wote, mbuⱡ mbal kurumuⱡa kᵾⱡ, na kᵾn rarᵾp rok tᵾkᵾn, nim gi gou andkᵾn, pipil kun uⱡ ei, panda rokᵾn kᵾn, nim nga mong raⱡ piral nangga, kᵾnin ei nga kopung ti, rarᵾp rok tᵾkᵾn, kopung kᵾndi!

19 Nanim kandᵾp numan ngor wamp ei, etᵾp elik mondᵾp tᵾp kun mundᵾp et. Ei kᵾn, nim na kᵾn etᵾn uⱡ mbᵾ nga, numan ou nduk ngukᵾn, numan ei ropᵾl rui! 20 Kum tek pilᵾiya! Na manga keta puⱡ puⱡ ila moⱡᵾp, kumba rop gep gep ndup mor. Ei nga, wamp ti ndi, na nga ik ei, pilpa mbi ndupa, kumba tᵾm ndam, na wamp ei kᵾn, rukᵾr omp moⱡᵾp, wamp ei kᵾn rᵾng nuimp, wote wamp ei, na kᵾn moⱡpa, rᵾng nomba.

21 Na nanim el etᵾp int pendᵾp, na nga Wuta nga rᵾpᵾndi pol ila mor. Ei mel ku, el etpa int pendᵾm wamp ti, na ndi, na nga rᵾpᵾndi pol ila muⱡi namba, kunda muⱡᵾmbil. 22 Kum nombuⱡa tem wamp ti ndi, Muⱡnga ei ndi, Got nga rapa tenda ila wamp kᵾⱡ, kundpa ninim ik ei pilangga!